قصة قصيرة جدا

صباح الخير عشان دلوقتى احنا الصبح بس انت لو بتقرا كلامى بليل يبقى مساء الخير ولا تزعل حقك عليا ، انا اسمى محمود يومى ممل جدا زيي زى اغلب الناس و أسف يا سيدى لو انت رويش مش ممل زينا ، طبعا لازم اعتذرلك و اتأسفلك اهم حاجة عندى متبقاش زعلان ولا شايل منى ده انتى حبيبى كفاية انك صبرت لحد دلوقتى و بتقرا كلامى ممكن يكون عشان انت فاضى اصل انا اول مرة فى حياتى اكتب حاجة فأكيد مش هكتب حاجة مهمة و اعمل نفسى فيلسوف ولا كاتب يعنى انا يدوبك بعرف اقرا عربى الفصحى ده كلنا فى الهوا سوا يدوبك على قد تعليمنا ما شاء الله عليه.
هكلمك عن يوم من ايامى المملة الطبيعية بتاعتى الهو بقوم الصبح مش بفطر بضرب سيجارة و فنجان قهوة واتجه للشغل ايوة اتجه اصلى اسكندرانى و هتلاقى كده شوية كلام بكسره نزيلنا طيلعنا كده يعنى ، معلش كل شوية بطلع من موضوعنا و اخش فى متاهات اعذرنى انا لسه بتعلم الكتابة او بحاول اتعلم اصبر عليا ابوس ايدك ده انت حبيبى ، اهو هرجع لموضوعنا، اوصل مكتبى وطبعا فى الأغلب بغسل وشى هناك عشان بكون نازل متأخر اصلى بحب السهر زى عينيا و معرفش ازاى مستحملينى فى الشغل أصلى بروح متأخر و لسانى طويل و كل يوم بزوغ من الشغل و دى حكايتى الهتكلم عليها انهارده ، اه هقولهالك تانى انا كل يوم بزوغ من الشغل اصلى اتعودت على كده من أيام المدرسة انزل من بيتنا اطلع على قهوة و العب كورة و اروح السينما مواصفات الطالب الفاشل كما انزل الكتاب ، طبعا البيزوغ من المدرسة و بعديها يزوغ من محاضرات الكلية النتيجة الطبيعية لنظرية فيثاغورس أنى ازوغ من الشغل و ده بيحصل بشكل شبه يومى اروح اقعد على كافيه اشييش و العب على تويتر أنا ملييش فى الفيسبوك انا بحب التويتر ، المهم قاعد أنا فى أمان الله زيى كل يوم و قاعد جنبى شاب رفنتوع كده و قصير و عمال يزعق ف الموبايل: ألو الو (بصوت عالى)
.....
أنتى فين يا زفتة كلمتك مرتين مش بتردى
.......
أقفل دلوقتى الأقيكى قدامى سامعة
.......
مليييش فيه دلوقتى
و راح قافل السكة من غير سلام حتى ، قلت لنفسى كده الواد قلة بس دكر اداها كلمتين كده مش ناعم من بتوع اليومين دوول نظام بقى انتى فين يا حبيبتى يا بيبى متتأخريش عليا انا تعبان اوى من غيرك كده يعنى الاشكال العرفنها ديه .
المهم يا صحبى اتلهيت فى الموبايل بتاعى و شوية كده الترابيزة الورايا قاعد عليها جوز ستات ستايل اوى و شكلهم كده من الناس الشييك دوول الفى المسلسلات بتوع التجمع الخامس و ارض الجولف ، واحدة منهم جالها تلفون و انا والله ما بتتصنت على الناس عشان بس متخدش عنى فكرة وحشة هى الصوتها العالى و الرجل الرفنتوع كان بيزعق فغصب عنى بسمع انا عمرى ما برمى ودن .
ما علينا ردت الست على التلفون : ايوة يا بيبى
......
انت كمان وحشتنى
.....
بجد كان نفسى تكون معايا هنا
.......
و انا كمان
.....
لأ لازم تييجى بقى كفاية شغل
......
ماشى يا حبيبى اشوفك فى البيت متتأخرش
.....
و انا كمان باى بيبى
قفلت الست السكة و فجاه الست الكلاس الستايل اتفتح بقها و طلع منه كل البكبورت الفى دنيا و بتقول لصحبتها بصوت قد كده:
يعنى انا سايبالك البيت يا معفن و نازلة افك عن نفسى شوية كمان عاوز تجيلى هنا
صحبتها: اهدى يا حبيبتى فى ايه بس مالك
الست: هو قارف أمى فى البيت كمان يقرفنى مكالمات و عاوز يجيلى كادك القرف يا شيخ
صحبتها: كلهم كده مقرفين يعنى شايفانى انا المبسوطة
الست: بس صلاح مرييحك قاعد فى الخليج ولا بيهش ولا بينش يا أختشى
انا مش عارف ليه بتعملوا كده يعنى مش مبسوطة معاه قوليله مش تتكلمى من ضهره ايه الستات ديه ، يعنى هو طافح الكوتة عشان يجيب فلوس تنزلى تتأنزحى مع صحبتك ده جزاته لا اله الا الله .
ما علينا شوية كده و دخل علينا رجل طول بعرض حاجة كده من بتوع البودى بيلدنج دولاب متحرك الهو لما بتقف وراهم تختفى يفكرك كده بفيلم زكى شان او مسرحية العيال كبرت و سعيد صالح لما بيحكيلك على جوز بتاعت البيانو ، دخل الدولاب و الاتنين الستات الورايا متابعينه فشخ الواد سيطر على موزز المكان و راح رايح على ترابيزة الواد الرفنتوع اياه ، عادى انا قلت يمكن يعرفه اصحاب يعنى ايه المشكلة المهم لقيت الشاب الرفنتوع ده راح مداور وشه الناحية التانية و مرضاش يسلم عليه ، قلت هبااااا كده شكله هيتفرم انت عبيط ياض الدولاب ده لما يمد ايده يسلم انت تمسك ايده تبوسها مش تتداور وشك  الناحية التانية كده هتتنفخ ، طبعا انا قعدت مستنى اليحصل فيه قلت هيشيله يرميه يلبسه فى الحيطة يرزعه قلم يقصمه نصيين حاجات كتير كلها شر طلعت قدامى قلت ربنا يستر عليك يا ابنى، الدولاب بدل ما يرنه علقة من دوول لقيته بيلف الناحية التانية و بيقوله :
خلاص بقى متزعلش
الواد الرفنتوع: بتستعبطى اصلك
دخلت صبعى فى ودنى اسلكها هو قاله بتستعبطى ولا بتستعبط لا لا اكيد سمعت غلط انا لازم اركز شوية روحت رامى ودن اسمع بيقولوا أيه
الدولاب: مش بستعبط بس فعلا كان عندى شغل متزعلش يا بيبى
بيبى دى خرمت ودانى و بقى الموضوع انترستنج جدا
الواد الرفنتوع :قلتليك ميت مرة لو روحت حتة و ملأتكيش مستنية  هيبقى اخر يوم فى عمرك
الدولاب : انا اسفة
اسفة دى يا صحبى خرمت ودنى والله اكن صاروخ ارض جو انفجر فى المكان قمت طبعا جريت و حلفت ما انا داخل المكان ده تانى بس طبعا مبطلتش ازوغ من الشغل بس بقيت اروح مكان تانى و ربنا يستر على ولاينا ، معلش طولت عليك